Молитва преподобномученице Елизавете

МОЛИТВА  СВЯТОЙ ПРЕПОДОБНОМУЧЕНИЦЕ ЕЛИЗАВЕТЕ

(читается на молебнах в Никольском храме села Ромашково)

 О, святая преподобномученице Елисавето, избранная от рода державнаго красото Церкве Российския, любовию изобильною Богу и милосердием ближним добре послужившая, за веру во Христа Господа нашего душу свою положившая, венцем славы Христовы украшенная и невестою Христовою быти удостоенная!

Боготечною звездою возсияла еси в земли Российстей, святая преподобномученице Елисавето, егда богатство и славу яко прах вменивши, в руце Божии жизнь свою предала еси, да послужиши Ему постом и молитвою, и к страждущим явила еси любовь и велие милосердие.

Благодати исполненнии сосуди явишася честныя мощи твои, святая преподобномученица Елисавето, ихже от поругания и безчестия спасти хотяще, благочестивии людие во святый град Иерусалим принесоша и в веси Гефсиманийстей на горе Елеон погребоша, к нимже припадающии облегчение, отраду и исцеления обретают.

Темже и нас, грешных, твоею молитвою исцели и путь жития нашего светом добродетелей твоих озари. Умоли, о мати наша, да сподобит нам Господь стяжати исцеление страстей, немощи наши да претворит в силу ко спасению, да не погибнем в пучине попечений житейских, но да возможем вечныя муки избавитися и Небесному Царствию наследники быти со всеми святыми, от века Богу угодившими.

О великая княгине Елисавето, жен российских украшение и радосте наша, приими воздыхание сердец наших, с любовию тебе приносимое, и твоим предстательством ко Господу дух правыя веры и благочестия в нас укрепи, в добродетели и милосердии нас утверди, помози крест скорбей с терпением и надеждою понести, в любви и согласии святой храм наш сохрани, да сподобимся в радость Господа внити, со Ангелы и всеми святыми славить Отца и Сына и Святаго Духа, ныне и присно и во веки веков!

Аминь!

Перейти к верхней панели